موجود طفش وملل بكميات تجارية!!
7 أغسطس 2007
بعد فترة من الغياب عن التدوين… أعلن عن وصولي إلى مرحلة الملل الذي يصحبه إكتئاب قهري موصول بأسلاك الطفش الخارجة من قلب المعاناة الذي يحتوي على البؤس الكامن…
هههههههههههه… حالة مستعصيه 
طيب في سؤال مكيم وخاش زحفان لين يصطدم بجبهتي…
لييييييييييييييييييش كل هذا الألم والطفش والملل؟؟؟؟
الجواب… لأني ركبت DSL
طراخ!!… (سؤال راميه واحد منكم على خشتي )…
ليييييييييييييييييش ما تحمد ربك وغيرك ينتظر له شهور وسنين؟؟؟؟
الحمد لله على كل حال… لكن الطفش والملل جايني لأني ركبت الــ DSL قبل ما أشتري كمبيوتر
وبعدين أنا بأسبقكم وأطرح السؤال التالي بنفسي لأن وجهي موب ملعب
السؤال يقول… علل… كيف يا ذكي تركب الـ DSL قبل ما تشتري كمبيوتر؟؟؟؟
والجواب… إني قاعد أنتظر الماك لما ينزل نظام التشغيل الجديد حقه حسب كلام شيخ الماكيين العلامة الفقيه الداشر ملياني
طبعاً هو قالي بالفم المليان… إذا بتقدر تصبر شهرين فنظام الماك الجديد راح ينزل وأكيد راح ينزل معاه أجهزة جديدة…
طبعاً الموضوع له حوالي شهر من هذا الكلام 
ووصل الحال بي إني استلفت اللابتوب حق أخوي وأنا ما أداني اللابتوب أصلاً ولكن علشان أشتغل به مؤقتاً لين يتفضلون حقين الماك وينزلون نظامهم الجديد…
لكن ما قدرت والله استحمل اللابتوب وواصله معاي…
لاني قادر استخدمه ولاني قادر أروح المقهى 
طيب أيش الحل؟؟
الحل إني أثور على هذا الوضع وأغيب عن العمل 3 أيام بما فيها اليوم
سحبت عليهم من دون سبب منطقي
والله واصله معي 
وبعد قررت إني أنسى الماك كم سنة عقاباً لهم وردعاً للآخرين
يعني راح أروح بكرة وإلا بعده وأجيب كمبيوتر مؤقت كم سنة لين ينزلون النظام الجديد حق 2010
وبعدها راح أشوف الوضع 
الفترة اللي غبتها عن التدوين كانت من أثقل الفترات اللي مرت علي في القرون الأخيرة
لكن ما باليد حيلة
راح أعوضها إن شاء الله بالتدوين كل ساعة وكل موقف يصير لي أو لأي واحد يمر علي في الشارع
أغلب المدونين المشاغبين في راحة مع إرتفاع الحرارة هذه الأيام…
والظاهر إنهم راحوا يصيفون وتاركينا نذوب في الفرن الطبيعي أو ما يسمى بالساونا الطبيعية
قاعد أفكر ذي الأيام بإني أكمل ماجستير إدارة أعمال في البحرين من كثر الفضاوة
إذا أحد منكم يبغى طفش وملل فأنا جاهز وعندي كميات تجارية بعد
وإذا كنتم خارج السعودية فيمكن إرسالها لكم عبر البريد السريع
دمتم بعيد عن الطفش والملل
