أبو ناصر vs. أبو سعد
2 أكتوبر 2007أبو ناصر: يا أبو سعد تراك مصختها… كل يوم طايح في البوفية ما عندك إلا عصير موز… حشا مو إنسان… إلا شاذي!!
أبو سعد: يا أخي ويش فيك دايما علي؟؟ تراها ما تسوى علي… أبترك العصير والسبة حنتك…
أبو ناصر: أقووووول إمش بس خلنا نروح عند الشباب نسوي لنا صكة بلوت أحسن من السوالف إلي ما لها طعم…
أبو سعد: يا أخي تراك أذيتنا… وبعدين معاك؟؟
أبو ناصر: والله يا أخوي أبو سعد ماني قادر أستحمل الجلسة معاك… يا أخي غثيتنا سوالف عن السياسة وما أدري شنو…
أبو سعد: الله يغربل شيطانك يا أبو ناصر… كل كلامي عن اللي يدور حوالينا… وإلا تبي تصير مثل الأطرش في الزفة؟؟
أبو ناصر: يا يوبه… ترى راسي صدع من الكلام اللي تقوله… أبي أسمع سوالف توسع الصدر… مو تضيقه!!
أبو سعد: خلنا نمشي بس نروح عند أبو خالد يمكن نحصل على قعدة من القعدات اللي توسع الصدر…
أبو ناصر: لا حشا… سوالف تقطع النسل… سوالف تجيب الإحباط مو توسع الصدر…
أبو سعد: أقول إمش معاي وإنت الكسبان…
أبو ناصر: شكلي بقطع علاقتي معاك… بالله عليك سوالف السياسة تجيب سعة الصدر وإلا الذبحة الصدرية وأمراض النساء والولادة؟؟…
أبو سعد: الله يغربل شيطانك… اللي يبي يترك السياسة يجي يماشيك والله إنك تخليه ما يفكر فيها مرة ثانية…
أبو ناصر: أقول أنا بألحق على سهرة أبو طامي اللي توسع الصدر صح… ويخليك تمشي صح في ها الدنيا…
أبو سعد: إييييييييييه علشانك هالمرة بس نروح لأبو طامي الليلة… وبعدين نروح ملح أقصد نروح لأبو خالد بكرة…
أبو ناصر: ما فيه مشكلة يا بو سعد… خلنا نوسع صدورنا الليلة وبكرة يحلها الحلال…
